Sumarið kom aftur!

Sólin er aftur sest að í Kaupmannahöfn og ekki verið líft í jakka eða öðrum skjólfatnaði í að verða viku núna. Húrra fyrir því!

Fótboltapartý hjá Daða og Svenna (og Freyju þessa dagana) eru hressandi þótt tilheyrandi skerðing á svefni sé síður hressandi daginn eftir. Niðurstaða gærkvöldsins: Leðurhausar kunna ekki að spila fótbolta ef þeir standa þá yfirleitt í lappirnar.

Litla systir ekki fyrr komin með ferðatölvu fyrr en hún lætur sjá sig á MSN í kennslustund. Skammast'ín stúlka, þótt glósurnar séu á netinu þá er ekkert sem segir að MSN megi vera í gangi.

Vinnufélagi minn var rétt í þessu að játa því að hann kysi Enhedslisten sem er í stuttu máli gamli góði sósíalisminn pakkaður inn í nýtt nafn. Ástæða? Hann vill ekki þetta "þeir sterkustu lifa af" hugarfar. Sá mun nú aldeilis fá endurmenntun í boði mín á næstu vikum því ef eitthvað er frumskógarlögmálið í stjórnmálum þá er það að þeir háværustu fá leyfi til að traðka aðra niður ef bara meirihluti hóps sem kallast stjórnmálamenn sannfærist um að það sé góð hugmynd. Urgh!

Hverjum dettur annars í hug að fyrirbæri eins og samhjálp, aðstoð, metnaður, velvilji, góðsemi og framtakssemi fæðist inn á skrifstofum manna og kvenna í þinghúsum heimsins? Sjálfsagt einhverjum.

Hvað um það, fótboltapartý á döfinni í kvöld. Bæjarlið Köben, FC København, komst á dularfullan hátt inn í Meistaradeildina og mætir Benfica í kvöld. Væntingar eru miklar og vonir sömuleiðis og því verður enn skemmtilegra að grínast í Dönunum á morgun þegar tapið er skjalfest.

Staðreynd: Lögbundin lágmarkslaun valda atvinnuleysi. Margsannað með bæði rökum og reynslu.
Tilgáta: Aukið magn koldíoxíðs í andrúmsloftinu veldur hækkun á hitastigi þess.
Af hverju eru þeir sem kyngja umdeildri tilgátu hrárri svona tregir til að sætta sig við staðreyndina? Mér dettur í hug eitt orð: Veruleikaflótti. Annað orð: Staðfestuskortur.

Hinn árlegi Heimdallsrússibani er farinn af stað. Enn á ný takast á hugsjónir og Samfylkingarfólk í dulargervi. Vonandi verður spenna í þessu (sérstaklega fyrir áhorfandann í fjarska sem fær hvorki símtöl né hvatningu um að mæta á kjörstað). Hugsjónarkandídatinn er óneitanlega myndarlegri. Í Háskóla Íslands var slíkt nægjanlegt til að viðkomandi fengi mitt atkvæði.

Það er nú meira hvað er mikið líf á MSN á hápunkti íslensks vinnutíma. Hressandi en athyglisvert. (Segir hver, bloggandi og linkandi út um allt? Já skamm bara!)

Ég ríf hausinn af einhverjum ef ég er ekki nettengdur heima innan 2ja vikna.

Yfir og út.