Blauta Danmörk

Enn einn flutningurinn innan vinnustaðarins nú að mestu afstaðinn. Mér fer bráðum að líða eins og Milton í myndinni Office Space.

Kannski ég reyni að finna hlutastarf fyrir næstu 2-3ja vikna Íslandsdvöl. Ég held að mér finnist betra að vera í fríi FRÁ venjulega vinnustaðnum en að vera í algjöru aðgerðarleysi á daginn.

Mikil rigning í Danaveldi eins og við var að búast og meira að segja þrumuveður í gærdag.

Lítur út fyrir ágætt samansafn af ferðalöngum til Köben á þessu misseri. Fallegu Strákarnir mínir hafa (flestir) lofað sér í nóvember, Fjármálaráðgjafinn er settur á okt.-nóv. einhvern tímann og Doktor Valur lætur líklega sjá sig einhvern laugardaginn. Á óskalistanum eru margir, t.d. flestir þátttakendur Ölympíuleikanna 2006, fyrrum kattareigandinn (og núverandi fátæki námsmaðurinn) í Firðinum og vel valin skyldmenni.

Danir skiptast áberandi í tvennt þegar kemur að því að kunna meta sælgætið Þrist.

Ruslritið Orðið á götunni segir að Björn Bjarnason sé "andlegur leiðtogi frjálshyggjuaflanna", þá væntanlega í Sjálfstæðisflokknum. Hvaða vitleysa er það eiginlega?! Þótt ég sé enginn Sjalli þá get ég ekki varist því að segja: Áfram Heiðrún!

Dagurinn í dag hefur verið mikill eirðarleysisdagur. Ég get varla tekið að mér fleiri verkefni því rétt handan við hornið er flóðbylgja þeirra og í millitíðinni er bara að reyna dunda sér við vanrækt smáverkefni. Ég skrifa varla alla viðverutímana á mig í dag. Samviskan leyfir ekki slíkt.

Vel grunnt í veskinu eftir Íslandsför en samt ekki eins grunnt og verstu spár gerðu ráð fyrir. Húrra fyrir því.

Ég býst við að Danmörk þyngist um kvart-tonn í dag. Sjáum hvort landið nái að halda sér á floti eftir það.